देवीच्या पालखीची रंगरंगोटी अंतिम टप्प्यात; चार दिवसांत काम पूर्ण होणार
तुळजापूर | विशेष वृत्तांकन नितीन खिल्लारी पाटील –
महाराष्ट्राची कुलस्वामिनी आणि लाखो भाविकांचे श्रद्धास्थान असलेल्या आई तुळजाभवानी देवीच्या मंदिरात नवरात्रोत्सवाची जय्यत तयारी सुरू झाली आहे. आगामी नवरात्र उत्सवाच्या पार्श्वभूमीवर मंदिर परिसरात विविध तयारीला वेग आला असून, देवीच्या पालखीची रंगरंगोटी व सुशोभीकरणाचे काम सध्या अंतिम टप्प्यात पोहोचले आहे.
देवीच्या पालखीला आकर्षक आणि पारंपरिक स्वरूप देण्यासाठी रंगरंगोटीचे काम युद्धपातळीवर सुरू आहे. आगामी चार दिवसांत पालखीच्या रंगरंगोटीचे काम पूर्ण करण्यात येणार असल्याची माहिती संबंधितांकडून देण्यात आली आहे.
नवरात्रोत्सवात आई तुळजाभवानीच्या दर्शनासाठी महाराष्ट्रासह देशभरातून मोठ्या संख्येने भाविक तुळजापूर येथे दाखल होतात. त्यामुळे मंदिर परिसरातील स्वच्छता, सजावट, धार्मिक विधी तसेच भाविकांच्या सोयी-सुविधां बाबतची तयारीही वेगाने सुरू आहे.
नवरात्रोत्सवातील विविध धार्मिक विधी, पालखी सोहळे आणि पारंपरिक कार्यक्रमांना विशेष महत्त्व असल्याने देवीच्या पालखीच्या रंगरंगोटीचे काम भाविकांच्या आकर्षणाचा केंद्रबिंदू ठरणार आहे. पालखीला पारंपरिक सौंदर्याची झळाळी देण्यासाठी कारागीर बारकाईने काम करत आहेत.
आई तुळजाभवानीच्या नवरात्रोत्सवासाठी तुळजापूर नगरी सज्ज होत असताना, मंदिरातील उत्सवी वातावरणाला आता हळूहळू भक्तीमय रंग चढू लागला आहे.
