सोलापूर, प्रतिनिधी : शिक्षक भरती प्रक्रियेत निवड झालेल्या उमेदवारांसाठी अत्यंत महत्त्वाची असलेली मूळ कागदपत्र पडताळणी प्रक्रिया आता सुरू होत असून, या प्रक्रियेला गैरहजर राहणाऱ्या उमेदवारांना नोकरीच्या संधीपासून कायमचे वंचित राहावे लागू शकते, असा स्पष्ट इशारा शिक्षण विभागाने दिला आहे. त्यामुळे निवड झालेल्या उमेदवारांमध्ये मोठी उत्सुकता आणि हालचाल सुरू झाली आहे.
पवित्र (PAIT) प्रणालीद्वारे घेण्यात आलेल्या शिक्षक अभियोग्यता व बुद्धिमत्ता चाचणीच्या आधारे गुणवत्तेनुसार निवड झालेल्या ३४९ उमेदवारांच्या मूळ कागदपत्रांची तपासणी बुधवार, दि. २ सप्टेंबरपासून करण्यात येणार आहे. ही पडताळणी प्रक्रिया जवाहरलाल नेहरू वसतिगृह, डॉ. बाबासाहेब आंबेडकर चौक, सोलापूर येथे सकाळी १० वाजल्यापासून सुरू होणार असल्याची माहिती प्राथमिक शिक्षणाधिकारी विशाल मुुळे यांनी दिली आहे.
दोन टप्प्यांत पडताळणी
शिक्षण विभागाने ही प्रक्रिया दोन टप्प्यांत आयोजित केली आहे. पहिल्या टप्प्यात १ ते १७५ क्रमांकाच्या उमेदवारांची, तर दुसऱ्या टप्प्यात १७६ ते ३४९ क्रमांकाच्या उमेदवारांची कागदपत्रे तपासली जाणार आहेत. संबंधित उमेदवारांनी आपल्या स्वप्रमाणित कागदपत्रांसह सर्व मूळ कागदपत्रे आणि त्यांचे संच सोबत आणणे बंधनकारक करण्यात आले आहे.
गैरहजेरी महागात पडू शकते
पडताळणीसाठी निश्चित केलेल्या वेळेत उमेदवार उपस्थित न राहिल्यास त्याची नोंद राज्यस्तरावर करण्यात येणार आहे. अशा परिस्थितीत उमेदवाराच्या निवड प्रक्रियेत अडथळा निर्माण होऊ शकतो. तसेच पडताळणी प्रक्रियेदरम्यान आवश्यक कागदपत्रांमध्ये त्रुटी किंवा विसंगती आढळल्यास उमेदवारी रद्द होण्याची शक्यता देखील व्यक्त करण्यात आली आहे.
शिक्षण विभागाने स्पष्ट केले आहे की, पडताळणी प्रक्रियेची संपूर्ण जबाबदारी संबंधित उमेदवारांची राहणार असून, कोणत्याही कारणामुळे गैरहजर राहिल्यास त्याची जबाबदारी उमेदवारावरच असेल.
अंतिम यादीनंतर नियुक्त्या
कागदपत्र पडताळणी पूर्ण झाल्यानंतर पात्र उमेदवारांची अंतिम यादी तयार केली जाईल. त्यानंतर साधारणतः ८ सप्टेंबरपर्यंत नियुक्ती आदेश देण्याची प्रक्रिया पूर्ण होण्याची शक्यता आहे. रिक्त राहिलेल्या जागा पुढील टप्प्यात भरल्या जाणार असल्याची माहितीही शिक्षण विभागाकडून देण्यात आली आहे.
उमेदवारांना सूचना
सर्व मूळ कागदपत्रे सोबत आणावीत.
स्वप्रमाणित छायांकित प्रतींचा स्वतंत्र संच ठेवावा.
वेळेत उपस्थित राहावे.
पडताळणीसाठी आवश्यक असलेली सर्व प्रमाणपत्रे पूर्ण असल्याची खात्री करावी.
विभागाकडून देण्यात आलेल्या सूचनांचे पालन करावे.
- शिक्षक भरती प्रक्रियेतील हा अंतिम आणि महत्त्वाचा टप्पा मानला जात असल्याने उमेदवारांनी कोणतीही हलगर्जी न करता आवश्यक कागदपत्रांसह उपस्थित राहावे, असे आवाहन शिक्षण विभागाच्या वतीने करण्यात आले आहे.
