सोलापूर : देशभरात १५ ऑगस्ट हा दिवस स्वातंत्र्यदिन म्हणून उत्साहात साजरा केला जातो. याच ऐतिहासिक दिवशी जन्माला येणाऱ्या नवजात मुला-मुलींचे विशेष स्वागत करण्याचा अनोखा संकल्प भगवा प्रांत न्यूज नेटवर्कच्या वतीने करण्यात आला.
स्वातंत्र्यदिनाच्या दिवशी रुग्णालयात जन्मलेल्या चिमुकल्यांच्या मातांना मिठाईचा बॉक्स देऊन अभिनंदन करण्यात आले. देशाचा स्वातंत्र्यदिन आणि नव्या आयुष्याची सुरुवात हा दुहेरी आनंदाचा क्षण असल्याने या उपक्रमाला विशेष महत्त्व प्राप्त झाले.
‘१५ ऑगस्टला जन्मलेले बाळ म्हणजे कुटुंबासाठी आनंदाची बातमी आणि देशासाठीही एक सुंदर योगायोग’ या भावनेतून हा उपक्रम राबविण्यात आला. नवजात बाळांच्या मातांच्या चेहऱ्यावर आनंदाचे हास्य फुलविण्यासोबतच त्यांच्या कुटुंबीयांना स्वातंत्र्यदिनाच्या शुभेच्छा देण्यात आल्या.
या उपक्रमातून केवळ मिठाई वाटप न करता देशप्रेम, सामाजिक बांधिलकी आणि नव्या पिढीचे स्वागत करण्याचा संदेश देण्यात आला. स्वातंत्र्यदिनाच्या दिवशी जन्मलेल्या या चिमुकल्यांनी भविष्यात देशाच्या प्रगतीत योगदान द्यावे, अशी सदिच्छाही यावेळी व्यक्त करण्यात आली.
भगवा प्रांत न्यूज नेटवर्क व लोक सम्राट न्यूज नेटवर्कच्या या संकल्पनेचे नागरिकांकडून कौतुक होत असून, पत्रकारिता ही केवळ बातम्या देण्यापुरती मर्यादित न राहता समाजाशी जोडलेली असावी, असा संदेश या उपक्रमातून देण्यात आला.
“स्वातंत्र्याच्या पर्वावर जन्मलेल्या चिमुकल्यांचे स्वागत… त्यांच्या उज्ज्वल भवितव्यासाठी शुभेच्छा!” हा संदेश देत हा उपक्रम उत्साहात पार पडला.
