सोलापूर, दि. ७ ऑगस्ट: सोलापूर जिल्ह्यातील महत्त्वाकांक्षी जिल्हा क्रीडा संकुलातील सिंथेटिक अॅथलेटिक्स ट्रॅक प्रकल्पाचे काम गेल्या अनेक महिन्यांपासून रखडल्याने खेळाडू, प्रशिक्षक आणि क्रीडाप्रेमींमध्ये नाराजी व्यक्त होत आहे. ट्रॅकचे काम ३ डिसेंबर २०२४ रोजी सुरू झाले होते. हे काम पूर्ण झाल्यानंतर जिल्ह्यातील खेळाडूंना राष्ट्रीय आणि आंतरराष्ट्रीय दर्जाच्या सुविधांवर सराव करण्याची संधी मिळणार होती. मात्र, कामाची गती मंदावल्याने हा प्रकल्प अद्याप अपूर्ण आहे.
या प्रकल्पासाठी सुमारे १५ कोटी रुपयांचा निधी मंजूर करण्यात आला असून, मुंबईस्थित कंत्राटदार कंपनीकडून काम सुरू करण्यात आले होते. सुरुवातीला काम वेगाने सुरू असले तरी नंतर विविध कारणांमुळे ते थांबल्याचे दिसून येत आहे.
माहितीनुसार, सिंथेटिक ट्रॅकचे काम डिसेंबर २०२५ पर्यंत पूर्ण होणे अपेक्षित होते. मात्र मुदत उलटूनही काम पूर्ण न झाल्याने जिल्हा क्रीडा अधिकारी यांनी संबंधित कंत्राटदार कंपनीवर दररोज एक हजार रुपयांचा दंड आकारण्याची कारवाई सुरू केली आहे. तरीदेखील कामात अपेक्षित प्रगती होत नसल्याने प्रश्नचिन्ह निर्माण झाले आहे.
यामुळे जिल्ह्यातील धावपटू, अॅथलेटिक्स खेळाडू आणि विविध स्पर्धांची तयारी करणाऱ्या खेळाडूंना मोठा फटका बसत आहे. आधुनिक सिंथेटिक ट्रॅक नसल्यामुळे त्यांना सरावासाठी इतर जिल्ह्यांमध्ये जावे लागत असल्याची खंत खेळाडूंनी व्यक्त केली आहे.
क्रीडाप्रेमी आणि पालकांनी प्रशासनाकडे कामाला तातडीने गती देण्याची मागणी केली असून, संबंधित कंत्राटदारावर कठोर कारवाई करून प्रकल्प लवकरात लवकर पूर्ण करावा, अशी अपेक्षा व्यक्त केली आहे. सिंथेटिक ट्रॅक पूर्ण झाल्यास सोलापूर जिल्ह्यात राष्ट्रीय दर्जाच्या क्रीडा स्पर्धा आयोजित करण्यास मोठी चालना मिळेल आणि स्थानिक खेळाडूंना दर्जेदार प्रशिक्षणाची सुविधा उपलब्ध होईल.
